20 Nentor 2022

Lajme jo të mira parashikohen për situatën e reshjeve në vendin tonë. Lajda Porja nga Shërbimi Meteorologjik Metoalb në dalje për mediat u shpreh se do të vijojnë reshjet e shiut në mënyrë intensive gjatë gjithë ditës së sotme deri në mesnatë, ndërsa do të ndërpriten të hënën, por do të rinisin të martën.

Sipas saj do të ketë përmbytje në disa zona, edhe në jug të vendit, ndërsa pa probleme parashikohet vetëm juglindja.

“Lajme jo të mira për sa i përket reshjeve, pasi do të vijojnë dhe do  ketë intensifikim të reshjeve edhe gjatë orëve në vijim. Jugu dhe kryesisht Vlora do të ketë sasi të mëdha shiu, deri pas mesnate. Reshjet do të kenë ndërprerje ditën e hënë, por do vijojnë sërish të martën dhe të mërkurën, deri nga mesi i javës tjetër.

Është tejkaluar norma mujore në të gjithë veriun, nëntori pritet të dyfishojë normat mujore në pjesën më të madhe të territorit.

Problematikat do shfaqen nesër me përmbytje, akoma më shumë pas të martës, ku do të kemi një celulë që do të prodhojë ende reshje, duke bërë që ditën e enjte do të kemi zgjerim të hartës së zonave të përmbytje. Juglindja nuk paraqet problem.

Edhe kryeqyteti do marrë reshje gjatë gjithë ditës së sotme, në mëngjesin e ditës së hënës, pritet të tejkalojë normën mujore të reshjeve. Lagje dhe zona të caktuara që kanë një historik përmbytjesh pritet të kenë problematika me përmbytjen.

Edhe Durrësi paraqitet problematik. E marta e mërkura do të sjellë sërish sasi të madhe shiu. 70% e territorit do të tejkalojë normën mujore. Përmirësim do të ketë ditën e enjte, ku do të ketë ndërprerje të reshjeve, ulje të intensitetit të reshjeve. Temperaturat nuk janë problematike, mbeten temperatura vjeshte”, tha ajo.

a.m/dita